《四個女仔三個BAR》抄韓「頭盔少女」谷收視 網民打冷震

aikowu

劇集《四個女仔三個BAR》的陳凱琳、何雁詩等早前拍攝網上版MV，卻激似韓國女團「頭盔少女」的兩年前舊作《Bar Bar Bar》，網友寸爆動作、歌曲旋律有九成似，歌詞亦屬洗腦之作。何雁詩昨日戲言只是惡搞該韓國女團，大家又有冇被嚇到打冷震？

上周五晚，何雁詩在fb上載該MV，劇中男主角之一張繼聰更在其fb出力狂推，短短三日共錄得逾70萬點擊率，但網友卻不大受落，鬧爆她們抄足韓國人氣組合Crayon Pop，除嘲笑該MV製作是是但但，又彈四位法律界小花跳舞動作唔齊兼唱得難聽，更有人怒斥睇到「打冷震」；不過，亦有網友力撑她們只是搞笑宣傳，更解釋Barrister是大律師，Solicitor是事務律師，呼籲大家一笑置之。事實上，不少本地藝人曾借韓流上位，當中最爆算是錢國偉，他找來一班圈中好友齊齊惡搞PSY的《江南Style》，成功炒熱人氣，更曾獲邀到澳門搵真銀。

何雁詩：只為娛樂大家
記者昨日致電何雁詩，她透露MV是公司決定拍的：「套劇叫《四個女仔三個BAR》，所以食番《Bar Bar Bar》首歌，同埋惡搞韓國組合。（網民批評你們？）我有睇呀，冇唔開心，有人講係好事，我哋只係娛樂大家。」

死神只峰

還沒有時間看

PuppyLuv

还有大把机会